بيعملوا بيه ايه؟ وبيشتغلوا فين؟

طيب هما بيعملوا بالابيدميولوجى ده ايه؟ وبيستفيدوا منه ازاى؟
بيعملوا بيه حاجات كتيره منها:
1- تقييم الحاله الصحيه للمجتمع وللناس,فيشوفوا ايه هى الخدمات الصحيه المقدمه للناس وهل هما بيستفيدوا منها ولا لأ, ويشوفوا ايه الامراض المنتشره اللى ممكن تصيب الناس وازاى يحذروا الناس منها.
2- البحث عن سبب الامراض واشهر مثال هو مرض انفلونزا الطيور والخنازير بتوع الابيدميولوجى هما اللى اكتشفوا السبب وهما اللى عملوا التحذير للناس وبرده بتوع الابيدميولوجى هما اللى قالوا ان السجاير بتسبب سرطان الرئة, وبالمناسبه منظمة الصحة العالميه(WHO) بتاعت ابيدميولوجى بس, يعنى مبيكشفوش على عيانين ولا الكلام ده دول بيكشفوا على الامراض.
وحاجات تانيه كتير.
طيب بيشتغلوا فين دول؟
المفروض بتوع الابيدميولوجى دول بيشتغلوا ف مؤسسات حكومية ومنظمات دولية زى منظمة الصحة العالمية وزى وزارة الصحة قطاع (مش عارف ايه كده للوقاية من مش عارف ايه) وزى الوحدات الصحية ووحدات طب الاسرة وخلينا نركز على الاتنين الاخاره دول اللى معظم الدكاتره اللى فيها بيبيعوا الدوا للمرضى ده اذا راح لهم مرضى اساسا.
ويقول لك لو رحت وحدة صحية يبقى خلاص انتهيت كدكتور (اهو اى كلام) مع ان دكتور الوحده الصحيه ده اهم طبيب ف مصر لانه هو اللى له التعامل الاولى مع جميع الامراض بالاضافه الى انه المفروض يشتغل ابيدميولوجى انا بقول المفروض لو مش عاوز هو حر بس مش عارف بقا هيبقى فلوسه حلال ولا حرام (ما هو مش فارقه اذا كان هو مش عارف المفروض هو يشتغل ايه يبقى هيدور على حلال ولا حرام)
وطبعا دكتور الوحده الصحيه ده واخد فكره خاطئة تماما عن دوره يعنى هو فاكر نفسه المفروض بالمشرطين اللى الوزاره مسلماهم له يعمل عملية قلب مفتوح ويولد قيصرى ويشخص (Chediak - Higashi syndrome) بمعمل تحاليل البول والبراز اللى عنده ف الوحده.
والمفروض طبعا ان صحة الناس هى الشغل الشاغل لطبيب الوحده الصحية بس مش عارف ليه معظم اطباء الوحدات الصحية من النساء اللى شغلهم الشاغل يروحوا عشان يطبخوا عشان العيال زمانهم راجعين من المدرسة.

وايه حكايته ده؟

الحكايه بدأت من زمان بيقولوا من أيام أبقراط (460 - 377 ق.م) اللى أطلقوا عليه أول ابيدميولوجى "First epidemiologist"
الأخ أبقراط لاحظ ان فيه علاقه بين حدوث الأمراض وبين ظروف بيئيه معينه (وأى حد بيفهم هيقول اننا نمنع هذه الظروف مش هتحصل الأمراض) وهو أول واحد فرق بين لفظ متوطن (endemic) ولفظ وبائى (epidemic).
عن أسامه بن زيد -رضى الله عنه- عن النبى -صلى الله عليه وسلم- قال "إذا سمعتم الطاعون بأرض فلا تدخلوها, وإذا وقع بأرض وأنتم فيها فلا تخرجوا منها " متفق عليه
أصل الانجليز الهبل بيقولوا ان عالم عندهم هو أبو الابيدميولوجى اسمه جون سنو(John Snow) هو صحيح عمل انجاز بس مش هو أبوه يعنى
جون سنو ده عمل ايه يا سيدى كان ف مدينه انجليزيه ف القرن التاسع عشر والناس جالهم مرض شديد وبيموتوا منه (الكوليرا بس ساعتها مكنش معروف ايه اللى بيسببه ولا معروف عنه حاجه) البلده الانجليزيه دى الناس كانوا بيشربوا من مصدرين للمياه وفيه ناس مجلهمش المرض دول كانوا عمال ف مصانع خمره دول مشربوش من مصادر الميه دى عشان كانوا بيشربوا خمره.
المهم هو لاحظ ان الناس اللى بيشربوا من مصدرين المياه دول هما اللى اصيبوا قال لك بس يبقى المياه هى سبب المرض وراح جايب كلور ودلقه ف الميه المرض خف جامد والناس مبقاش يجيلهم المرض.
طبعا ف القرن التسعتاشر وواحد عمل حاجه زى دى يعتبر انجاز كبير
والمبدأ ده هو من أهم مبادىء علو الابيدميولوجى
المهم دى نبذة تاريخية بسيطه عن الابيدميولوجى.

هو ايه ال Epidemio ده؟

هو اختصار كلمة Epidemiology وهو العلم اللى بيتعامل مع الامراض وازاى بتحصل وازاى يمنع حدوثها ومش موجود منه ف مصر.